साझादर्पण
उदयपुर । प्रतिबन्धित लागुऔषध गाँजा प्रयोगकर्ता र कारवारीको ठूलो संख्या भएको जिल्लामध्ये उदयपुर पनि हो । जिल्लाभित्र र जिल्लाको बिभिन्न भूभाग प्रयोग गर्दै हुने कारोवारी सेटिङलाई निमिट्यान्न पर्न प्रहरीले कडा कारवाही जारी राखेसँगै तस्करीमा संलग्नहरुले नयाँ नयाँ तरिका अपनाउन थालका छन् ।
स्थलगत या सवारीसाधनबाट ओसारपसार गर्दा प्रहरी र सूराकीको निशानामा परिने भएपछि कारोवारीहरुले सप्तकोशी नदीलाई माध्यम बनाएको तथ्य फेला परेको छ । सोमबार एकाविहानै उदयपुरको बेलका नगरपालिका ८ कोठु र सुनसरी सीमा क्षेत्र सप्तकोशी (चतारा पुल) नजिकै नदीमा तैरीरहेको अवस्थामा ठूलो परिमाणको गाँजा प्रहरीले बरामद गरेपछि रहस्य बाहिरिएको हो ।
सप्तकोशी किनारामा तैरीरहेको अवस्थामा केही पोका पारिएको वस्तु जस्तै देखिएपछि शंका लागेर प्रहरी गएर हेर्दा गाँजा फेला परेको थियो । जिल्ला प्रहरी कार्यालय उदयपुरका अनुसार बरामद गाँजाको तौल अन्दाजी १ सय ८० किलो रहेको छ ।
एकाबिहानै करिब २ बज्दै लाग्दा गाडीको टायरभित्रको ट्युबमा ६ पोका प्लास्टिकभित्र सिल गरिएको गाँजा भेटिएको थियो । स्रोतका अनुसार गाँजा उत्पादन भएको पहाडी भूभागबाट पैदल बोकेर या गाडीबाट ल्याउदा प्रहरीबाट पक्राउ पर्ने डरले ट्युबले तैराउदै नदीकोबाट बिक्रीका लागि लैजादै गरिएको हुनसक्ने बताइएको छ ।
जिल्ला प्रहरी कार्यालय उदयपुरका प्रहरी उपरिक्षक (एसपी) हरिहर नाथ योगीले भने विशेष सूचनाको आधारमा इलाका प्रहरी कार्यालय रामपुर ठोक्सिला र अस्थायी प्रहरी पोस्ट कोठुबाट खटिएको प्रहरी टोलीले बरामद गरेको जानकारी दिए । बरामद गरिएको गाँजा हाल इलाका प्रहरी कार्यालय रामपुर ठोक्सिलामा राखिएको छ भने घटनासँग संलग्न व्यक्तिहरुको खोजीलाई अगाडि बढाइएको छ । कोशीमा बगाएरै ओसारपसार गर्ने सो कारोवारी समूहको भने पहिचान र खोजी कार्य भइरहेको प्रहरीले जनाएको छ ।
पछिल्लो समय उदयपुर बिभिन्न लागुऔषध कारोवार र प्रयोगकर्ताको जक्सनको रुपमा देखापर्न थालेको छ । केही महिनायता दिनहुँ लागुऔषध कारवारी र प्रयोगकर्ता समातिन थालेपछि अभिभावकहरु चिन्तित बनेका छन् भने प्रहरीलाई पनि नियन्त्रण तथा न्यूनीकरणका लागि चुनौति देखिएको छ ।
१.
२.
३.
